Imal

Iffu serk lhâl ay imal, amya ur ak t nhîyyel,
amer arraw ijlan, tegt idirn llasnin...
ndûf azemz ar gis ngemmer
ur d udad, urd atbir, ur d azenkwêd,
mac yat tizi icwan ;
tizi n ufessay.
ar nettal tafukt kaygat ass ar tt nesgan,
ar agh ffaln ussan
igllinen...!
ar netteql s ufessay
ayelligh nghal is ur igi :
amer tawargit ;
zund tawmert, zund tiderfit...
negh asnnifel.
nekkwni imugas n uzemz ad,
isemgan n umezruy,
tafaska n imal !
azâzu f wakal,
ndêfer ubbic murran, d idels anafal..
ar netsikiy ar nttelmad. nasik ay asirem
urd imik gh tudert nnegh,
imil iggru d sul :
is aka nttelmad; af ad ad netsikiy.
mad agh tehêdit ay imal ?
manik an gik nga ?
nzuzêd ad nssen mad tgit,
ad nzêr, mad nega ?
han nekkwni ur agh tsiwidt ;
is rak neskar... is rak neskar...