Izillîd

Iggut umedlu ula izillîd, iguten waggagen ula usman
Iga d umedlu tillas ig d unzâr imettâwen
Aggagen d usman, rrsâs, ijiwi iga takat
Yut axyyam bbin t, yut man gis ufan
Mmuten mdden s lghdêrt, igigilen ar ukan allan
Amettâ irmi t umagus, ilîh ma ten itterhâmen
Agharas immenàa issa s usennan
Anmuddu irufa gh tmazirt gh llan waman
Iz d is iggul wakal ur ran a sul semghayn
Nigh d iz d amud a sul ur iran ad nekren
A tent ihêsn yan urta luzzant igh iferk
Igh luzzant munent labud man iffal
A tent ihêsn ljid gh lhul isber nit
Âh mla ur igi sber ur sar ijud
Igh d iterm umalu tiffawin is-d ruhênt ?
Ar ad a njud s wawal f uzemz ad nfaser t
Maf tga ssâbt amazûz ig usmam amadagh
Igli wasif adrar idâlb lbhêr laman
Iga d lhul ccbayk neg nkwnin iselman
Ig leghdêr anemyur ig laman abukâd
Ig uccen ameksa ig asen umksa amessagh
Icca uccen ameksa tg as tili taghuyyit
Argaz iga t lmal bulàaql iga anewwac
Ig wajbir lkenz ig ttêmâ agharas