Ssûr

Âh inu ghlix ar iggi nk a ssûr nqqamun
Nwwaghn nit ad ndêrgh tattuym flagh
Ssûr iàllan d ma giwn illan n wakal
Rbbi d ayt Rbbi d làar tini kwen ssuhêln
Amalu nk a gis nggawr ini tn tumrt
Illa gis yan ddwa jjrt inu trxa nit
Amalu nnk a ssûr iggut mattin inawan
Is ukan ka nek iggut mani nkka nimyir
Nek ar nsggan adâd nek kiyyin a nmyar
Inid iqqan a tn bbix ghassa yuf imal
A ssûr iàlan ngablk tasut ikmmln
A ssûr isêha nekk iggi wn ilan lmirat
Tayyisi igan ccrà as ra k nkkus a ssûr
Yan idàan idî d rrsum inna nkkin
Ikkis yit yan lqadî s ghmklli ka ran
Nufa tin gan ljahil mamnk at nhûl
Mddn yak at ar yyi gis tmmalam s ufus
Mi kulu tgam inagan mac lhêq ur illa

Way udad llif a ssigutn isyyâdn awal
Ur agh tid ttawit a lucart n imi uburi
Awal s imckukûdn yuf rrsâs igh darun
Acku jjhat ur tga tin wanna igmmrn
Isyyâdn mmhêsadn f izênkwad rurn jlun ak
Ad angh isqnàa Rbbi imma udad ijla yax
Han lqîst inu tugr ma ittara yan
Ar nttara aylligh nnran lhêruf lqlm
Atbir izêran lbaz ifl arraw asulil
Nga yak yan gh tnddimt nek ula nttan
Tanamirt a nzîdêr kra flli turit
Atbir ar ka ismuh nek ra nit nsawl
Nttan ifl ihêrdâd nns nkki flxn ssûr
Ssûr ittêfn tawnza nns af ak nsawal

Darlbîda, 1982