Lixrt tga ccarij

Rrja fllah a ddunit ur gim îdhr yat
Tgit talmrit isklulun tuggugt n yan
Ufigh yan usafar I ddunit lal ijrman
Ad as ka nsfûd asaru zun d aman gh lmlk
Ar kigh lkmn akal ssuxt ntta a idawmn
Ddunit kmmi ayyi yurun kmmi agh lulx
Tarut immi talli yi yurun, kmmi agh yurun
Kullu ma tturut ar ttarun mad am d iffal
Nkkin yan ddlil ad am ufigh rix at dawmgh
Ad nskr lhêsab is nra a gim gawrgh tasut
Nskr lhêsab assf ar assf is ngz akal
Nskr lhêsab i lhêsab, lhêsab is d iqqan
Zayd a ddunit nkki hayyax nudâ d fllam
Iggut ma issudan asatur ira ad yasus
Ddunit tga bdda zund ussan n abril igh d lkmn
Lligh idl ujddig akal mac lxrif imdi yas
Ndâlb as i sidi Rbbi ad angh inna, aggwl atnt
Imma igh ra nhêsu kullu mad nnsn ar agh jllun
Rbbi a ihênnan Rbbi a iqqaman Rbbi a idawmn
Kun fa yakun, a ittini s iglb lflk
Kun fa yakun, a ittini s nit ihda yan
Kun fa yakun, a ra yini isahl d fllax
Yan wanaw ar issiwid
Igh a isawal ar izziwiz
Ur ira lhâq ur ira ccrà
Ur ira ghmkad wala ghmkad
Hak awa s ya- wamud!
Ddunit tga uggug ittasin aman, lixrt tga ccarij.

Darlbîda, 1982