Gh tdgwat n wass n usmwas 23/02/2006 tnsa yat tsafut n umarg amazigh gh tmazirt n ibrkak gh ammas n Sus, intlnn fllax antal n walid (n wbadan) gwmatnx Mulay Àbdlkbir Cuhad, yiwis n ayt àtman gh Ighil n ibrkak, lli igan yan gh inbdadn n usays n umarg , ghiklli iga yan gh inbdadn n trabbut n urcac, ifl agh àbdlkbir sul nit iflujja, zund yan ujddig lli hra iskrn tayyawin akwin d fllas tukkin ssukfn t ssusn t, iklli ityasay iman nns (rruh ns)  asint tiysas ayt umarg kra gh llan, acku lmut nns urtn itam yan. Isuq nit lxmis n isaffen ar tadgwat, lligh ilkm Imi n Titgar ikcm s tgmmi isdunn ad isu asafar lli issa yighar as lkas gh ufus, ad irhm Rbbi mulay àbdlkbir, izzugz d tazidêra f twja nns, ur ngi bla wins dars as ra ad nwurri. Kraygat amarir ass a ar isawal ar d ittây aylli ihêdan g wul nns f tmtrut ad. Nkki lli bahra issimghur ad gx amddakwl n umarir ad, iqqand ad sawlx.

âhh ur d âhh ar ad angh issifêd attân
Igh ur nufi walli nra ad ids nmun
Iqqan d ad zzidêrx i tawdiwin
Ul inw ad yazmz ad n tlkm dàut nnk
Tasa nw a tasa sawl ini d mamnk
As ittyafa rrûh inw ad iyid wurrin
Walli d crkx tîtt inw idda t gisnt
Yiwi t wass nns ighawl ggwizn akal
Allah t a winu manza laxbar nnk
Igh agh tnna talàint ahaw darnx
Marad dsul ncrk asrir igh t lkmx
Ha  Titgar mdudint idêr d fllas
Ighir n umuddu lli kwn igan gh ufus
Yiwi kwn a winu ar wissa ignwan
Yajjagh tagudî d lktêrt n ighuyyan
A Àabdlkabir a ccrif a gwma tngh
Iwnx i wasif n mda nadr i tîtt
Kullu ignziwn gan tiwangimin
Mami tflt akal n Ighil n Ibrkak
Hann anya d tghlaghalt nnk ar brrin
Sul awkan tsutuln gr tgwmmaw
Kun aghzu gh Ighil irêzm d i tghuyyit
A Àabdlkabir a ccrif a agwilal
Ati imarirn d ayt umarg urrin
Ad didk ngaran acku lafàal nnk
Mani gh sul ufix a kra talghat nnk
Mani gh sul ufix a nghr tabrat nnk
Igh nssfld i “lalayl alay dalal”
Ibag d umêtta gh udm inu igllin
Allah t a winu manra ad sawlx
Walayni hakkak as d ndî lhul nnx
Ndî d ayllid ittyaran gh ul nngh
ghayad n ddunit igh srs izàm yan
Utn t s uqmlil ikcmnn i tghufiw
A llayhnnik a tagwmat ndêfr kin
Ur nzêdar ak id ngli s làcrt nngh
A llûh lmhêfûd ad yuran hakkak
Mlad is ufix ad ng afus gh ufus
Nmun dik ullah ar nit irêda wul
Ad ur nasi tassast ur itdawan
Tiwim tasafut n tguri d wawal
Ur agh d ighama ghir tawwargit nnk...

A llûh lmhêfûd isawl inin
Igh ismussa lajal rrêsas nns
Ad ur tirit adak ifk awal
Yallah yallah ajj at angh ukan
A Warzazat agh ar ntlulluy
Imikk s igh nssld i tarsâsin
Lmut yusi tnd ur agh cawrn
Nra ad nsawal iggall angh inin
tamart n cuhad ar ak awix
mqqar fllak ig lhâl tillas
Iqqand a tzzîdrm i ufus nngh
maxx a lmut alligh iyyi thâca t
yak ayda nnun ur jjun ak t uklx
yak ahêric nna darun tusi t
tawnt ka i tmizar ar tnqqat
ur jund nkkin a gik ismuqln
gh ass ad walabudd ad srk sawlx
tikkurdâ nnun ad agh imkakan
tukrm ajddig ur akw yasus
sul ar nit ismghay afraw ns
sul ar nit ismday aslal nns
àbdlkbir awrz ns ur t ufix
gh ass ad gh agh nghuban lhêruf nns
Tallûht inu tugi angh afus
A ayt Ighil ad akw ur tinim
A Titgar ad iyid akw ur tinit
Han aghwrab ad idêrn ur t annix
Kullu iclhîyn gh usays n Sus
Tlkm tn a tagûdi ccan takat
Kullu ayt imurig ar asn allan
Walayni igh rad nnix wakwak
Amnx s lmktub ur ad t nakrx
àbdlkbir igh idda fln tisnt
Ifld nit amud nnm a lkimit
Awal  n cuhad usar tn lahh
5/3/2006

A àbdlkbir nssld asn igh nnan
“Wanna saqsan mddn mank ad n tgit
Ar ittini labas mqar brin”
A awal da s nnan nttan d wayyâd
Ati luqran làadîm agh llan
A ddunit hann issara tt ubrray
Assar ur tamnt adâr igh nnan:
Yâz agh ubrid nsnt ur ar brrin
Wa gar abrid ddunit ka agh llan
âhh a mick n yan a ggis ihnnan
Ur issin is ir ad d ifl aghrram
Ifl tarwa nns fln igran d waman
Iddu dar walli t ixlqn ad hêssun
Tamssirt ns tyara as igllin
Igh ar yaqra yini mayad skrx
A àmda n yan innan ati hnnax
Ass n tnkra asif nns ighd yiwi
A kun azêru labudd ad gis zrrin
Mqqar ig asmmaà ur ad t zgln
A àbdlkbir mlat ax ma ijran
Mamnk ad n tufit akal n uàmmar
Ullah amk nri ad gisn tbrrit
Is ndâlb i Rbbi nngh a kkin zzrin
Ati lafàal nnun af kid bdrx
A han ur sar nttu lligh kin zêrix
Tusit assfiw n ssiàr d unzgum
Wannan ilkmn akal nnk gh imddukkal
Ula aqbil tml t as tigmmi nnun
Inigi nga tn ddunit agh llix
Aylli zêrix ayad ur d is jlix