Taghufi

Ddigh ur dari mad ayk a winu ttinigh
Adâr inu ar ittidu tasa nu kmmi n
Ad gis inghan igidr lli kkusigh nkki n
Tayri nm tikssâd inu ugigh ad rwlgh
Ndl srs ar nssa gis nffagh isuyas
Imghza aragh qqazn gh ismdâl nnagh
Inaghan f wiyyad ur jjin salan ur rmin
Ddigh ur dari mad ayk a winu ttinigh
Igh nfl kra nddu han is nra ad t awigh
Ad didi ilin ur idda an drgh ssikln agh
Ur rad sar naf nkki dis ad sul nsawal
Tngha iyyi taghufi waxa yuf an ur adugh
Ad akw ur tnnit id is kwn ttugh ur ufigh
Ighra iyyi kra iqqan agh d ad t lkmgh nflk
Ddigh ur dari mad ayk a winu ttinigh
Igh tddit dar usagwm kti d is ak nnigh
Imun unzâr d tagut gh ulawn kigan
Ass nna bdân issudu unzâr akal nnagh
Ibbaqi d wakal igr s tudrt ng amud
Imttawn n tagut igh taggug agh assan
Nkki d im ar nssa win tîtt igum agh
Ddigh ur dari mad ayk a winu ttinigh
Tgit andaru lligh a tlalan igadrn
Ur ssingh aylligh nstara timizar
Kmmi n ur tssnt nghal is a tn tnqqat
Nffugh nsguttî kigan ngr s unaruz
Nghal is naggug nmun bddâ gh ugharas
Nqql s unzâr d tagut ad bdûn nmun
Kigan ad ntini ghmk ur jjit urigh
Ghass ad gh turigh ha tabrat inu tlkm n

Âli Sidêqi Azayku