Nzant

Nzant mqqar tuzzlt kiyyin tâhlt
Awin gik ismdân d tmmariwin
Afus ula yadâr ccant n isnnan
Ttut mad ur igin ad tnt ttannayt
Nttntin jjawnt gh tuga lli nit ttirint
Kiyyin tizi ghd udânt tannit arraw
Tafukt tsmun aznzar hîyylnt tillas
Taghwrit tlla frujjant akw talatin
Trmit ! mac tawargit nk mmimnt
Anaruz illan gh ugns ifkak tumrt
Tutt sisnt aggas ttut irafan
Askka nk afa ttazzalt ar ttrfufunt
Manzat ?! bu taddart ttun tammara nk !
Zznzan tid fa ttazzalt urak t nnin
Tttast nttan tagdift ak mmalan
Ull nk zund aznzar fkank i tillas
Nzant ! aggas ad tgit illa f wakal
Tudrt aghdjaj nk ini isasan
Tutilt anaruz nk manik yuman ?!
Tallat ulawn n uzzal ura tmussun !
Walli tnt iznzan kiyyin ad wattsn
Myarn gik ad tgnt ura tmussut
Awal nk zund igigil ur ak t n rin
Kiyyin tgit aznzum trakin tmttant
Nzant ! amtta nk iggut ur as sllan
Ur ad ssmghurn isa smzziyn igh ad tsulut
Assa n tzêrit targagayt taft agharas
Tigmmi rad ak d aggint mad ttn t yusin
Willi iskkan agadir llan gh isntal
Wiyyad ccan imndi ns awin tillas

Muhêmmad Akwunâd