Laksîda

Ifulki lêhdid igh dis ur imun zzerb
Wanna izrin han ur a ssar as imun lghrêd
Lqqist ixef inu jlan agh ar agh ikkend
Ghar agwêdi nnad ghligh ighwi yyi wayyâd
Magh imlan is agh îhsad lkafer billah
Mnacek a nejla gh uhêwac gh Sus ula gh ccerg
Alligh darengh illa imikatin gh ljib
Nnigh walabbud ad sisen zûragh lhîj
Inna gh ixassâ k làaqel ixassâ k usêlab
Ma trit lhîj is ka gik illa isîd
Awid ya ubbil negh di tiwi t alzêfag
Imma lhîj ajj at ar kigh ak illa gh lghrêd

Neddu sghagh ubbil nfeken gis ya leàdad
Neg asent rradyu ula ssêbagha n lejdid
Nnigh zud nekkin ur sul illi gh lgherb
Yan angh ur issen meskin igh ar anegh ittemnid
Igh izêra ubbil izêr ijlubbay n lejdid
Iqqan d a yenna d ixef nnes luzir ayad
Ar neskar cciki igh nesûg ar nttelàab
Namêz lbula s yan ufus rzêmgh lbab
Sul neftu myya gh ugsar ula gh lfiraj

Lfayda ha lqudra n Rebbi ha ssibab
Inna làaqel inu righ a nmun ad nzêr leblad
Nzûr d lwalidayn ad agh imun lghrêd
Neffugh agadir afella n lxemsa n ghyyîd
Namêz agharas ihâhan ar neziggiz
Ur ak gitengh illa lxuf ula jju neksûd
Lkemgh lhêncan nggez nzêr gis lêhujuj
Nzayden aman i lmutûr agh ur ihêrg
Nagwen ula lisâns ilemma ar nziggiz

Lfayda sidi Lemxtar Ccan nlkem tid
ur ak gis nebid acku illa gix zzerb
Ghar nezri tin ukan s igh lkemgh lfiraj
Sellagh nit i ubbil zun ibaqqa iggig
Wis sa igenwan agh an sigh ukan ttelàab
Kkigh ya usega ikk tent ula rribab
jadarmiyya hâdern d mdden kullu munend
illa kra meskin ad didetengh ittensifîd
imik ha labilanês iga zud asemmîd
asin agh rkkit n sbîtar agh an neggiz
ghar nelkem tin nnigh nit lhâmdu lillah
lligh angh uten yat tassmi skdûn agh lbenj
ibid nit ukan udêbib ar agh ittemnid
ighren i yan ufermliy inna asen serbid
lligh tin lkmen ar ten fellagh ittenbbah
innas keyyi han lxdemt nnek iga t ghwad
sawal sis ar igh iffegh làaqel tawi tend

Izayd ilemma ufermli ar agh itteknad
ar angh isaqsa gh lexbar n Sus ula ccerg
inna agh manik iga litcin is ilûh amud?
Yak timitâc ur tent ihêrg usemmîd
Walli kra gh agh isaqsa sersgh asen tend
Imik s imik ar neshitir ar neskdub
Ar angh imala litcin inna yyi mayad?
Nnigh asen ur xligh igh tmalam aferzîz

Lfayda inna yasen awey at wad i udêbib
Han ur sul illi d ixef nnes ula ar nettmnid
Ar as nemala litcin innagh aferzîz
Lfayda asin agh nkcem ghid neffugh d ghid
Alligh nelkem dar leftîh inna yas ttêbib
Kref at gh ifassen tass mas idâren d jjenb
Ad ur faqen s igh a smussugh ar ittiwid
Itêlq fellatengh i lbûla zud ajeddig
Imik s imik neg lêhbaq issum agh lbenj
Isers d ilemma lamwas sersen d lmujud
Ar angh ittazu zund igh a ttazun aghâd
Mlays ira rad akw gigh skren leqddid
Walayni Rebbi yumer as iga yyi ssibab
Lhîl nqqen tirêziwin asin iyyid
Lbit n laxatâr nezri gis amer yyîd
Asin agh d s lbit imudân agh neggiz
Nufan gis mdden nig xemsin igh ur ndenb
Illa kra meskin ibbi yas udâr ad ula ghwad
Illa kra meskin irêza gh ufus azelmâd
Ku yan d ikenna sas yumer mulana at ig
Illa kra izzri radyu bbin as ahêbûd
Aman d uzekkif as ukan iàic ihêmd
Lmakla tujad ifek at Rebbi ghar iccîd
Walayni meskin allen as tend ittemnid
Kaygat sêbâh izri fellasent ttêbib
Wanna ukan igan i ddwa ifek asen tid
Wanna ra yafûd leksut nnes ad i tujad

Ass n ljamà lligh ilkem dduhr ha lâhbab
Ku yan d lfamila nnes ikka yasend jjenb
Illa kra yusi d akw gh ufus ad ulla ghwad
Illa kra yiwin meskin adîl ula lluz
Illa kra meskin ur dars illi uhêbib
Ula lfamila man sis ittagan iqnêd
Izayd asen wattân lxuf iggi wayyâd
Illa kra inna s aldemsir ifta ddûr ad
Ur a smussun adâr ula afus ula jjenb
Ula aghrûm ur as akw izdâr at izzuguz
Ghar lêhlib ad as igan zud arraw n waghâd
Walayni ghikan ijra yagh ur igi lekdub
Ullah amk akw nnigh is ra sul nghwi rribab
Ula ar sul nttidu f wakal ar nttelàab

Walyni Rebbi iàfa agh lhêmdu lillah
Mlawkan ufigh a nbid a sul nziggiz
Nsamêh i tûmubil berragh lbacklîd
Ula lmutûr ras neg ghar adâr nefjjij