Ixef inu

Ixef inu yuda yyik gh ilulluyen
Ayt lhawa da f nddêser lâh ten
Ha kra inghuba ccan ten ikalen
Ha kra imudda lâh t ula rri nnes
Ha kra izzâ gisen ttêma yawi ten
Cwer awdi helli fek at lxâter
Ya izrben rad lkmen sul asawen
Ya ikabren ad ak ur tennit ufx
Ma ixlqen gh igenwan ula ikalen
Iblis lkiber ka ten akw ilûhen
Ingiri d Rebbi nnaàlet ifel ten
Iga gh igeldan lumuld nnes
Ikcem t lkiber ttun mat ixlqen

Ur derk ax ad nnix yan ufax t
Ula rix ad as nefk ula as nkkes
Rrêhmt Rebbi a dar en kullu llant
Yan f ijud rebbi mar at issihêl
Mqqar illa ger walf n tawwunt
Ur sar ksûden yan tin ikkaten
Ur netsudun i kra afus nnes
Ar t nettmjad agh ifek lmal nnes
Larzaq Rebbi a dar en kullu munn
A bnadem tub issan mak ixlqen
Ccirak ur ijuz i yan t ittensâren

Ya ihûbban rebbi mmagh f imsulmen
Ad gin idûdan ifassen munnen
A wer icc kra adîl icc yan ifer nnes
Lghdêrt tella gigh ur telli nniyt
Zun d agherda d umuc gh igharasen
Kuyan ira ad ittaker imik icc t
Ikkes uhêbûd nnagh fella luqer
Kul ma nzêra gigh an sis ifassen
Ccahwa zun d tazzanin issumumen
Igh tella tibbit ar ka tllint
Igh lâha tibbit ar nit allant
A lhawa rad nrar sik làaqel
Imurig n ddin af tersâ luqt
Imma lekdub uremgh t ur issufegh
Ar jellun mdden ghar f igharasen

Ur a nttêzi d lxelq ur at uttegh
Ay ifassen d idâren inu akwen kerfgh
Acku kweni ad iruren ikurayen
Lhûrma n Rebbi ad agh ifek lqenà nnes
Ighfer ddunub imma ar ka serwategh
Nettu lqber d lmut is llant
Ula lêhsab issen is itengh iqqel
Azêru d iferg ass an fella ttersen
Ur agh ibbid lmal ula amarg
Ula lâhbab mqqar kullu mmaghen
Laàmal inu d lxir ka ar an afegh

Lhûrma n Rebbi ad irar s igharasen
Ya wer irin ad ilin s làaqel nnes
Han ra tezri ddunit teflkwen ssâht
Imdu ccabab n yan sul mêzziyen
Iknuten ccib asin takurayt
Manza willi d ufigh kullu mmuten
Manza baba d immi ula xalis
Lanbiyya n Rebbi lawliya mmuten
Ya wer iffughen ddunit kerf imi nnek
Han tella tagat ar ka tellint
Llan willi trêz llan willi immuten
Igh kullu yad njemen ur mmuten
Iknu ten ccib ar igh kullu krfen

Menck a terba ddunit f ighir nnes
Igh rasen trzêm tallt tut sisen
Menck n yan iga lmeskin nssen ten
Hêrmen gh ljib ryal ghila ttâfen
Menck n yan a dar ur telli ssâht
Kulci idêbiben hêrcen issermi ten
Iàef as rebbi dagh ar ka terqqasen
Ddunit d lmizan ur ittersâwen
Ya wass igadda ya wass imiyyel
Ya yegan lfahim issêfu ka nniyt
Lghder d làib ihêrm ka f imuslmen

Zund ya wass a ddunit ra kwent nffegh
Nessu akal ndel siwen ay ikalen
Lemskin ula bu lamwal mmuten
Ya wer irin ad ilin s làaqel nnes
Ra ten ttgwerâz igh iffegh igharasen
Eg askerf i ccahwa ula tît nnek
Ay asebbab illan s lmal nnes
Ma yera yan ad ur ikcem ssuq nnes
Ixdem s làerg nnes as nit imimen
Yan yattûn mdden man sâha yiwi
Is ka ihêsad làrec igh n munn
Larzaq mmerdân is ka ra yyahêl
Arja fellah làaqel inu telfen.